top of page
-
Myanmar gam buaina sungah 𝗭𝗙𝗨 kalsuanzia policy bang dan ahi hiam. Revolution nungah khangno hiamtawite vai ding gelna a om hiam?Hih pen a kidong mun mahmah dotna khat ahi hi. Hih tawh kisai 𝗭𝗙𝗨 in kalsuanna step 5 in kinei hi. 𝗦𝘁𝗲𝗽 𝟭. 𝗥𝗲𝗷𝗲𝗰𝘁. Dictactorship cih limlim kideih lo hi. 𝗭𝗼𝗺𝗶 Kawlmi cih hih tuan loin ukcipnopna lungsim limlim kideih lo hi. I deihlohnate lampi om khempeuh tawh leitungbup muh khiat dingin lungphona tangkona gamtatna kinei khin hi. Ki awng khia khin ta. Tua hun bei ta hi. 𝗦𝘁𝗲𝗽 𝟮. 𝗥𝗲𝘀𝗶𝘀𝘁: Nial ding,Kiging ding. Do ding. Ukna Buluh Galkapte do huan kik dingin kigin hun le kido hun hi ta hi. Tulaitak hih hun sung ah i om lai tak hi. I do ding pen Zomi le Zomi hi lo a, Ukna buluh migilo Galkapte ahi hi. Minam bup i tha-hat ding, i sep ciat ding kisam mahmah hi. Ei pan theih tek pan in i pan ding kisam hi. Amun amual pan a do a nang khangno om ding. CDM tawh a do te om ding. Tua te a panpih, a huh om ding. Sum le pai tawh a pang zong om ding. Hih bang a sem te hoih tak kithu za ding cih ahi hi. ZFU cih min a ding akisem hi lo hi. Ei teng kipum khat ding ban ah, kiim le pam, sak le khang, a nai a gamlate tawh zong kizopna kician i neih ding kisam hi. Khat kia tang tat lo a, ei mun tek ah kiciantak in ipan theih ding kisam phamawh hi. Hih mun ah hun sawt ding maw sawt lo ding cih pen ei Zomi sung i thahat zawhna leh minam tuamtuam te kikal ah nasep khop theihna tungah kinga hi. 𝗦𝘁𝗲𝗽 𝟯. 𝗟𝗶𝗯𝗲𝗿𝗮𝘁𝗲: Tua bangin ei muntek pan i maban ciat i zawhna, vaipuak ilak zawh ciat khit ciangin mipi suahtakna Freedom kingah kik ding hi. Mipi deihna tawh kituak gam uk kumpi kingah kik ding hi. 𝗦𝘁𝗲𝗽 𝟰. 𝗭𝘂𝗺𝗹𝗲𝗵𝗶𝗮𝗺 𝘃𝗮𝗶 Lunggulhnate i tangtun zawh ciangin i munlui ciat kizuan kik ding hi. Abeisa a i nusiat i mabante kizom kik ding hi. Adiakdiak in zumlehiam tawi lam pen Security Sector Reform (SSR) kici in, galkap pen akisam den hi in, ahi hangin galkap uniform silh te laulau a kul nawnlo ding pen a thupi le a kisam pelmawh thu hi. Hih tawh kisai pen Civilian Supremacy kici in galkap thautawite tungah telcing Gammakai te thuneihna om hamtang den ding cih pen ZFU ii kipatkhiatna le a dinmun ahi hi. Tua bang dinmun ah galkap a sem suaknuamte in suakta tak in sem suak ding hi. 𝗦𝘁𝗲𝗽 𝟱. 𝗙𝗲𝗱𝗲𝗿𝗮𝗹 𝗗𝗲𝗺𝗼𝗰𝗿𝗮𝗰𝘆 Tua hun ciangin Federal Democracy ngeina tawh Zogam, Myanmar gam kiuk ding hi. Zomi te in Zogam tung ah thuneihna nei ding hi. Mipite thuneihna nuai ah a om Zogam Government, Federal Myanmar Government kinei ding hi.
-
Chin State ah ICNCC leh CC group nih om cileng tua kikal ah ZFU dinmun bang hiam?ICNCC pen 2021 April kha in hong piangkhia a, Union level ahi NUG, NUCC te ah Chin State ading official state council khat ahi hi. CC ahih leh CNF/A leh a nungzui pawlkhat te 2023 in ICNCC pan paikhia in a ki pan thak kipawlna ahi hi. ZFU in tuni dong ICNCC tawh thuk tak in ma kipang khawm a, alliance dang te ahi Kanpetlet, Mindat, Matupi, Falam pan gamvai leh thautawi kipawlna te tawh gamvai galvai ah khauh tak in na kisem khawm hi.
-
CDM tawh kisai ZFU nasepziate nong tel gen thei dia?CDM vai pen athupi le a kilunglut mahmah thu khat hi mah hi. Lungdam ung. ZFU pen group tuamtuamte kipawl khopna ahi hi. ZFU CDM support team (Department) zong CDM alut ngiat te makaihna tawh kisem hi cih gen masa nuam hang. CDM list te, non-CDM list te pen Zum tuamtuam pan kikaikhawm a, mimal mahmah in min pia zong om hi. ZFU-CDM Team pan akihawmkhia sum khempeuh pen gamsung gampua a om Zomi te piakkhiatna vive ahi hi. Panpihna sum a piakhia kipawlna le mimalte kiangah zong ahi thei zah in ngahna zatnate Report kipia tanghtangh hi. CDM te safety nading in a ngah te min pen online ah kitangko lua lo hi. Ahi zongin, CDM sum hong piakhia kipawlnate theihpih ding in kiciantak in kipulak hi. ZFU huamna sungah CDM lut mimal 2500 kim kipha a, tua lak panin March kha in mi 1335 le april kha in mi 904 tungah panpihna kipiakhia hi.
-
Kuate in CDM panpihna sum ngah hiam. A ngah lo zong tampi om ci leng tua pen bang hang hiam?Amasa in CDM lutte sung pan khasum sanglo le a hamsa zawdeuhte ngah hamtang dingin kihanciam hi. Tua zom ah CDM lut limlim khat vei ta beek piak zawh ding kihanciam hi. Ahi zongin tua bang dinmun kitung zo nailo hi. A kipat cil lamin CDM support pen Tedim/Tonzang Township sunga CDM lut khasum sanglote tungah Fund om zah tawh kizui in kihawm diamdiam a Township dang, Regional & State dang pan Tedim/Tonzang lam hongciah CDM lutte khempeuh support kipia zo pah lo hi. Mundang ah sem aa khasum sanglo a cimawh diak pawl khat pen a hithei bang bangin a kivaihawm sak zong om hi. Tu lam ciangin bel tua dan vaite alen ding zong kinei ta hi. Tunung lam tak teh May kha sung CDM support ading Fund i ngah hong kiam mahmah banah Education Department lam pan CDM lut Sia/Siama 1000 val bangin khasum hong sangloh tak teh Support team te ki lungkham mahmah hi. Cih nop na ah Fund lut tawm semsem in CDMer tam semsem cih na hi. Tua ahih manin Fund ih ngah sunsun pen number စဉ် လိုက် aa piak ding leh urgent need te pia masa in vekpi' ngah dong kihawm to ding aa tua zawh teh no. 1 pan kipan kik a hawm dingin kigel hi.
bottom of page